Rusesabagina: Umwunganira asaba gereza gukora iperereza ku bivugwa n’umukobwa we

Me Gatera Gashabana wunganira Paul Rusesabagina ukurikiranyweho ibyaha 13, avuga ko umukobwa w’umukiliya we Carine Kanimba hari umuntu umwandikira wiyita ‘Hamiss Mjinya’ uvuga ko arinda se, ariko ko adafungiye muri gereza ya Nyarugenge.

Uwo ‘Hamiss Mjinya’ yabwiye Carine Kanimba ko se afungiye muri gereza ya gisirikare hamwe na ‘Sankara’ na Herman Nsengimana.

Uwera Pelly Gakwaya, umuvugizi w’urwego rushinzwe imfungwa n’abagororwa mu Rwanda, mu nyandiko, yasubije BBC dukesha iyi nkuru avuga Rusesabagina ntahandi afungiye, ati: “Rusesabagina afungiye muri Gereza ya Nyarugenge – Mageragere”.

Paul Rusesabagina n'abana be, Carine Kanimba (ibumoso)

Iyi nyandiko ivuga ko Kanimba atajya asubiza ubutumwa bw’uwo muntu kandi yabweretse urwego rw’iperereza rw’imbere muri Amerika, FBI.

Gashabana asaba ko niba Rusesabagina atarekuwe gereza ya Nyarugenge iha urwo rukiko raporo ku buzima bwe bitarenze iminsi irindwi, agasubizwa ibye byafatiriwe, akanahabwa ibyangombwa bimufasha gutegura urubanza mu mizi.

Asaba urwo rukiko kandi gutegeka ukuriye gereza ya Nyarugenge gukora iperereza ku bivugwa n’uriya wiyita ‘umurinzi wa gereza’ ku buryo Rusesabagina afunze, agaha raporo urwo rukiko.

Rusesabagina aregwa ibyaha 13 bishingiye ku bitero byahitanye abantu byagabwe n’umutwe wa FLN mu Rwanda, umutwe Rusesabagina yagiye aboneka mu mashusho avuga ko ashyigikiye, kandi yemeje mu rukiko ko yoherereje amafaranga.

Abantu batandukanye biciwe ababo n’abagizweho ingaruka n’ibitero bya FLN mu Rwanda bagiye batangaza ko bategereje ubutabera mu rubanza rwa Rusesabagina.

Mu rubanza mu mizi, biteganyijwe ko Rusesabagina ashobora kuzareganwa na Nsabimana Callixte uzwi nka ‘Sankara’ wari umuvugizi wa FLN, n’uwamusimbuye kuri uwo mwanya Herman Nsengimana.

 6,049 total views,  2 views today

0Shares

Leave a Reply