Congo: Abarinzi 200 muri 700 barinze pariki ya Virunga barishwe

Abarinzi batandatu bo muri pariki ya Virunga muri DR Congo biciwe mu gico bikekwa ko cyatezwe n’inyeshyamba.

Abategetsi baravuga ko umutwe wa Mai-Mai, umwe muri myinshi ikorera muri aka agace, ari wo wakoze ubu bwicanyi.

Aba barinzi batezwe igico mu gihe bariho bakora uburinzi n’amaguru muri pariki nk’uko umuvugizi w’ikigo cyabo yabibwiye BBC dukesha iyi nkuru.

Abakozi bakora muri iyi pariki, ibamo ingagi zugarijwe no gucika, ni kenshi bagiye bagabwaho ibitero. Mu kwezi kwa kane umwaka ushize, abarinzi 13 b’iyi pariki barishwe mu gico nabwo batezwe n’inyeshyamba.

Imitwe myinshi yitwaje intwaro ikorera mu burasirazuba bwa DR Congo hafi ya pariki ya Virunga – agace UNESCO yashyize mu tugize umurage w’isi.

Itangazo ryasohowe n’ikigo gicunga iyi pariki rivuga ko aba barinzi ku cyumweru mu gitondo “batezwe igico batunguwe ntibabone uburyo bwo kwirwanaho”. Rivuga ko undi murinzi yakoretse bikomeye muri iki gitero ubu akaba ari kuvurwa, gusa byitezwe ko azakira neza.

Alphonse Kambale umwe mu bategetsi muri aka gace, yabwiye AFP ko umwe mu barwanyi ba Mai-Mai nawe yasize ubuzima mu mirwano.

Mu barinzi hafi 700 bakora muri pariki ya Virunga, mu myaka irenga 10 ishize muri bo 200 bamaze kwicwa, nk’uko ibiro ntaramakuru AFP bibivuga.

Abarinzi bakora muri iyi pariki ahaba ingagi zugarijwe no gucika, kenshi bagiye bagabwaho ibitero (ifoto ya cyera)
Abarinzi bakora muri iyi pariki, ahaba ingagi zugarijwe no gucika, kenshi bagiye bagabwaho ibitero (ifoto ya cyera yafashwe na AFP)
map of Virunga
Imiterere y’iyi pariki

 15,629 total views,  6 views today

0Shares

Leave a Reply