September 18, 2020

The Source Post

Real news from real source

Ndizera ko u Bubiligi na EU bashobora kubwira Kigali kurekura Rusesabagina-Me Vincent

Umubiligi ukora akazi ko kunganira abantu mu by’amategeko, Me Vincent Lurquin, avuga ko afite icyizere ko Paul Rusesabagina uherutse kugaragara mu Rwanda acyekwaho ibyaha by’iterabwoba azarekurwa agasubira mu Bubiligi.
Ni inyandiko igaragara mu kinyamakuru Dhnet.com, ivuga ko Rusesabagina, “umunyafurika w’umubiligi, intwari ya filimi yiswe Hotel Rwanda “yafatiwe Dubaï, asinziriye akoherezwa i Kigali (Le belgo-africain héros du film Hotel Rwanda “capturé à Dubaï, endormi et transféré à Kigali”).
Uyu munyamategeko arashaka kujya i Kigali kunganira uwo iki kinyamakuru cyise Schindler w’umunyafurika, bashaka kuvuga ( Oskar Schindler,
Umusirikare w’umudage warokoye ubuzuma bw’abayahudi bari hagati y’1100 na 1200 muri jenoside yabakorerwaga).
Hari bamwe babihuza na Rusesabagina ku byakinwe muri filimi Hotel Rwanda, avugwaho kurokora abari bahungiye muri hoteli imwe y’i Kigali nubwo hari andi makuru abivuguruza.
Rusesabagina ngo yari yagiye i Dubaï ari kuwa kane, ku Cyumweru yisanga i Kigali, kuwa Mbere agaragara yambaye amapingu ku maboko ari imbere y’itangazamakuru. Kuri uwo wa kane saa kumi n’ebyiri n’iminota 27, nibwo Rusesabagina yaterefonnye umuryango we awibutsa isabukuru y’amavuko bagombaga kwizihiza.Ku bijyanye nuko byavuzwe ko Rusesabagina ashobora kuba yarijyanye ku bushake, ngo umuryango we urabihakana, ukavuga ko ari abashakaga kumwica, Me Vincent akongeraho ko ngo yasinziriye akisanga yagejejwe i Kigali mu ndege yigenga, icyo yita kwica amategeko mpuzamahanga.

Me Vincent avuga ko ashaka kujya mu Rwanda kubonana n’umukuliya we avuga ko u Bubiligi bwamufataga nk’impunzi, ku masezerano mpuzamahanga ya Geneve agena iby’ubuhunzi. Akomeza avuga ko umurongo utukura warenzwe ku kibazo cya Rusesabagina.

Agira ati ” Ndizera ko guverinoma y’u Bubiligi n’umuryango w’ubumwe bw’u Burayi bashobora kubwira Kigali badaca ku ruhande, icya 1; kurekura Rusesabagina, icya 2; agasubira mu Bubiligi, icya 3; niba ubutabera bw’u Rwanda bufite ikirego bukagitanga, kuko ubutabera bw’u Bubiligi ntacyo burega Rusesabagina.”

Akomoza ku bijyanye n’ibyaha bikomeye Rusesabagina yavuzweho ubwo yerekwaga itangazamakuru, birimo iby’iterabwoba, Me Vincent avuga ko byerekana ko nta yubahirizwa ry’ihame ko utarahamwa n’ibyaha aba ari umwere, ahubwo ko byerekana ukuregwa (accusations de culpabilité).”

Rusesabagina aherutse gutangariza ikinyamakuru The East African cyamusuye aho afungiye, agitangariza ko yakiriwe neza.

Dosiye ya Rusesabagina yashyikirijwe urwego rw’ubushinjacyaha, ivuye mu bugenzacyaha.

Mu kiganiro cyaciye kuri televiziyo y’u Rwanda ku cyumweru, Perezida Paul Kagame yavuze ku rubanza rwa Callixte Nsabimana ‘Sankara’ (wemera ibyaha ashinjwa uko ari 17 birimo icy’iterabwoba) na Rusesabagina avuga ko bakoranaga, n’abandi bafashwe bakajyanwa mu Rwanda. Abo bari mu buyobozi bwa FLN ishinjwa kugaba ibitero byaguyemo abantu mu turere dutatu mu Rwanda, ku bufatanye n’amashyaka atandukanye akorera hanze y’u Rwanda.

Perezida Kagame yagize ati: “… bazagira aho bahurira buri wese ashinje undi, ibyo yakoranye n’undi, cyangwa ibyo yakoresheje undi, ngira ngo muzi case y’uwitwa ‘Sankara’, hari n’abandi…”

Inyandiko ya DHnet.com
0Shares
Translate »