2018/19: Abagabo 86 bishe abagore babo, abagore 30 bica abagabo

Urwego rw’igihugu rw’Ubugenzacyaha RIB rutangaza ko muri 2019 abagabo 49 bishe abagore babo na ho abagore 14 na bo bica abagabo.

Imibare y’Urwego rw’Igihugu rw’Ubugenzacyaha igaragaza ko muri  2019, abagabo 49 ari bo bishe abagore babo na ho abagore 14 bica abagabo babo. Ni mu gihe muri 2018  abagabo 37 ari bo bishe abagore babo, na ho abagore 16 bica abagabo babo.

Abahanga mu birebana no gukumira no guhosha amakimbirane bemeza ko ibi bigira ingaruka z’igihe kirekire mu muryango igihe nta gikozwe ngo ibi bibazo bihagarare nkuko tubikesha RBA.

Tariki 21 Mata 2018, Ntezimana Jean Damascène wari utuye mu Murenge wa Karenge mu Karere ka Rwamagana  yishe umugore we bashakanye Muhawenimana Beatrice bari bafitanye abana 6.

Nyuma yo gukatirwa igifungo cya burundu, abana babo 4 basigaye barerwa na Nyinawabo wa nyakwigendera abandi 2 bakuru umuhungu n’umukobwa bafashe icyemezo cyo kwibeshaho bakomeza kuba iwabo.

Aba bana bavuga  ko ubuzima butaboroheye na gato, aho usanga no kubona icyo kurya bibagora.

Mukakibibi Anonciatta wasigaranye abandi bana 4 na we avuga ko ari icyemezo gikomeye yafashe na we kitamworoheye bitewe n’uko abana be bose bari bamaze gukura ariko yiyemeza kongera kurera abana bato.

Avuga ko aba bana byabagizeho ingaruka.

Ikibazo cy’ubwicanyi mu muryango nanone giherutse kugaragara mu Murenge wa Kinyinya mu Karere ka Gasabo ku itariki 9 Kanama uyu mwaka ubwo Daniel Zirikana yicaga umugore we w’imyaka 22 bari bafitanye umwana umwe. Uwakoze ubwo bwicanyi kugeza ubu yarahunze akaba agishakishwa n’inzego z’ubugencacyaha

Kuri uyu uyu mwana w’imyaka itatu  ubu ari kurerwa n’umuturanyi.

Umuhanga mu birebana n’iterambere n’uburinganire akaba n’umwarimu muri Kaminuza y’u Rwanda Dr. Hategekimana Celestin avuga ko iki ari ikibazo gishobora kwaguka kikarenga umuryango igihe kititaweho.

Umuyobozi w’Umuryango urengera abagore n’abana HAGURUKA, Monique Munyankindi  avuga ko ubwiyongere bw’imiryango itandukana yiyongera ari kimwe mu bimenyetso bigaragaza ubukana bw’iki kibazo.

Ubushakashatsi bwakozwe n’urwego rw’imiyoborere RGB mu mwaka wa 2017, abaturage babajijwe bagaragaje ko amakimbirane mu miryango yari hejuru ya 50% by’imiryango yose mu gihugu, muri 2019 ubwo bushakashatsi bwongera kugaragaza ko amakimbirane yo mu miryango yari ku kigero cya 60.7% na ho umwaka ushize wa 2019, amakimbirane mu muryango yari ku kigero cya 70.39%.

Inkuru irambuye mu mashusho

 13,208 total views,  2 views today

0Shares

Leave a Reply