July 12, 2020

The Source Post

Real news from real source

Coronavirus:Uko Amerika iri kwitwara ni akajagari karenze ukwemera-Obama

Uwahoze ari Perezida wa Leta Zunze Ubumwe z’Amerika,Barack Obama yanenze bikomeye uwamusimbuye Donald Trump kubera uko ari kwitwara mu guhangana n’icyorezo cya coronavirus, avuga ko burimo akajagari karenze ukwemera.

Obama yavuze ibi mu gihe abantu barenga 77,000 ubu bamaze kwicwa na coronavirus muri Amerika, naho abagera kuri miliyoni 1,2 bamaze kwemezwa ko bayanduye. Ni ukuvuga ko Amerika iri imbere mu gupfusha abantu benshi no kugira abanduye benshi.

Yabivuze mu butumwa butari bugenewe gushyirwa ku karubanda, yagejeje ku bari mu nama na we mu buryo bw’iyakure, ashishikariza abo bahoze bakorana ngo bakorane n’itsinda rishinzwe kwamamaza Joe Biden, nkuko BBC dukesha iyi nkuru yavuze ko bitangazwa na televiziyo CNN yo muri Amerika.

Obama yavuze ko uko Amerika iri kwitwara muri iki cyorezo ari “akajagari karenze ukwemera”.

Mu kumusubiza, ibiro bya perezida wa Amerika White House byatangaje ko igikorwa cya Perezida Trump “kitari bwigere kibaho mbere cyarokoye ubuzima bw’Abanyamerika”.

Muri iyo nama yo mu buryo bw’iyakure, Bwana Obama yavuze ko uburyo bw’imitegekere bw’uyu wamusimbuye wo mu ishyaka ry’abarepubulikani ku ruhande rumwe ari bwo bwo kwitwaraho umwikomo ku buryo Amerika ihanganye n’iki cyorezo.

Amagambo ye yo muri icyo kiganiro yasubiwemo agira ati:”Byari kuba bibi niyo biza kuba ari ku butegetsi bwiza cyane. Byabaye akajagari karenze ukwemera mu gihe cy’imyumvire ya ‘nabyungukiramo iki’ no ‘gushyamirana na buri muntu wese’, iyo myumvire nk’iyo ari yo iri gukoreshwa muri leta yacu”.

Obama kandi yananenze bikomeye icyemezo cyo gukuraho ibirego kuri Michael Flynn wahoze ari umujyanama w’Amerika mu bijyanye n’umutekano w’igihugu, washinjwaga gukorana n’Uburusiya mu kugena ibyavuye mu matora ya perezida w’Amerika yo mu 2016.

Coronavirus imeze gute muri Amerika?

Abantu barenga 77,000 ubu bamaze kwicwa na coronavirus muri Amerika naho abagera kuri miliyoni 1,2 bamaze kwemezwa ko bayanduye.

Mu kwezi kwa gatatu, leta nyinshi zo muri Amerika zashyizeho ingamba za ‘guma mu rugo’, ariko ubu zazikuyeho, bituma abantu basubira ku mirimo yabo.

Ariko abategetsi bo mu rwego rw’ubuvuzi baburira ko ibi bishobora gutuma iyi virusi ikwirakwira kurushaho.

Uburyo Trump akoresha mu guhangana n’iki cyorezo bwakomeje kugenda buhindagurika bya hato na hato.

Mu kwezi kwa kabiri, yahakanye avuga ko nta kaga iki cyorezo giteje kuri Amerika, avuga ko kizahita kizimira, ariko hagati mu kwezi kwa gatatu, yemeye ko ari ikibazo gikomereye igihugu.

Mu kwezi gushize kwa kane, yatanze igitekerezo cyuko kwitera mu mubiri imiti yica udukoko (izwi nka ‘disinfectant’) bishobora kurinda coronavirus, ikintu impuguke zahise zamaganira kure.

Mu cyumweru gishize, yavuze ko agiye gukuraho itsinda ryihariye rya leta ye ryo guhangana na coronavirus, ariko nyuma aza kuvuga ko rizakomeza akazi karyo ariko ryibanda ku gutuma ubukungu bw’igihugu bwongera gukora mu buryo busanzwe.

Ntakirutimana Deus

0Shares
Translate »