June 5, 2020

The Source Post

Real news from real source

Nta wanduye Coronavirus wagaragaye mu basaga 800 bapimwe

Leta y’u Rwanda iratangaza ko mu bantu 806 bafashwe ibipimo nta n’umwe wabonetsemo wanduye coronavirus.

Ni nyuma yuko inzego zishinzwe ubuzima mu Rwanda zikomeje gushakisha ababa barahuye n’abapimwe bagasanganwa icyorezo cya coronavirus. Minisiteri y’ubuzima yatangaje ko iri gushaka abagiye bahura n’abanduye iyi ndwara aho kwanduzanya biri ku rwego rwa kabiri.

Uretse kuba itangazo ryashyizwe ahabona na Minisiteri y’ubuzima mu ijoro ryo kuwa 7 Mata 2020,rigaragaza ko nta murwayi mushya wabonetse uyu munsi, rinagaragaza ko hari abantu 7 bamaze gukira iyi ndwara. Ni ukuvuga ko hari abakize iyi ndwara batatu bamaze kwiyongera ku bandi 4 bamaze gukira iyi ndwara bakaba baratashye. Abamaze kwandura iyi ndwara ni abantu 105. Abanduye iyi ndwara bari gukurikiranwa ku buntu nkuko igihugu cyabyiyemeje.

Itangazo rya Minisiteri y’Ubuzima

Iyi minisiteri mu minsi ishize yatangaje ko imaze gushakisha no guhura n’abantu bahuye n’abanduye bangana n’1464 mu bantu 1672 bahuye n’abarwayi. Ni ukuvuga ko bari hejuru ya 85% bagera ku bantu bose bahuye nabarwaye n’abahuye n’abafite ubwandu bw’iyi ndwara.

Ku rwego rw’Isi, abantu 1 407 123 bamaze kwandura iyi ndwara, abagera ku 297 934 barakize mu gihe abagera ku 80 759 imaze kubahitana. Igihugu kiza imbere mu kugira abanduye iyi ndwara ni Leta Zunze Ubumwe za Amerika zifite abantu 385 449 banduye iyi ndwara, 20 027 barakira, abagera ku 12 216 barapfa. Hakurikuraho Espagne ifite abantu 140 511 bayanduye, 43 208 barayikira mu gihe 13 897 bapfuye. Icya gatatu ni u Butaliyani bufite abanduye 135 586, abagera ku 24 392 barakira, ihitana 17 127.

Ntakirutimana Deus

0Shares