June 5, 2020

The Source Post

Real news from real source

Ghana: Abaganga bahanganye na Covid-19 bongejwe 50%, abaturage basonerwa kwishyura amazi

Perezida wa Ghana Nana Akufo-Addo, yatangaje ko leta izishyurira abaturage bose amazi mu gihe cy’amezi atatu uhereye muri uku kwa kane, naho abakozi bo mu rwego rw’ubuzima bahanganye na coronavirus umushahara wabo wongeweho 50%.

Gukaraba intoki n’amazi meza n’isabune ni bumwe mu buryo bukomeye abahanga bavuga ko burinda gukwirakwiza iyi virus.

Muri Ghana hamaze kuboneka abantu 214 banduye Covid-19, muri bo batanu imaze kubica naho batatu barayikize nkuko BBC dukesha iyi nkuru yabitangaje.

Mu ijambo ryaciye kuri televiziyo y’igihugu ku cyumweru, Bwana Akufo-Addo yavuze ko hejuru ya biriya, abakora mu rwego rw’ubuzima bose bazasonerwa imisoro ku mishahara yabo mu mezi atatu ari imbere uhereye muri uku kwa kane.

Bwana Akufo-Addo yavuze ko ibi ari ibyemezo bigamije gufasha abantu guhangana n’ingaruka mu bukungu z’izi ngamba zo kurwanya iki cyorezo.

Mu cyumweru gishize, Ghana yafashe ingamba zo kurwanya ikwirakwira ry’iyi ndwara zirimo guhagarika ubuzima busanzwe (lockdwon) mu mijyi ya Accra, Tema na Kumasi aho iyi virus yiganje mu gihugu.

Kompanyi igurisha amashanyarazi nayo yategetswe kutagira umuntu ikuriraho amashanyarazi muri iki gihe.

Bwana Akufo-Addo yategetse ibi bigo byombi – igitanga amazi n’igitanga amashanyarazi – gukora ibishoboka ibyo byombi ntibibure muri ibi bihe.

Ntakirutimana Deus

0Shares