Mu Rwanda hagaragaye abandi bantu bane banduye Coronavirus

Minisiteri y’ubuzima mu Rwanda yatangaje ko hari abantu bashya bane banduye indwara iterwa na virusi ya Corona, yiswe covid-19.

Ni ukuvuga ko abanduye iyi ndwara bamaze kugera kuri 5, kuko aba biyongera ku Muhinde wagaragaye bwa mbere nk’uwanduye iyi ndwara mu Rwanda.

Imibare iheruka y’ishami rya Loni rishinzwe ubuzima ku Isi (OMS/WHO) ivuga ko abantu 169,610 ku Isi bamaze kwandura iyi ndwara, imaze kwica 6,518 naho 77,776 barayikize.

Mu Rwanda basuzumirwa mu isuzumiro rikuru ry’igihugu National Referral Laboratory riri mu zikomeye ku Isi.

Minisiteri y’ubuzima ivuga ko abandiye iyi ndwara ari; Umunyarwanda w’imyaka 34 wageze mu Rwanda tariki 6 Werurwe aturutse muri Sudani y’Epfo.

Muri Sudani y’Epfo ariko kugeza ubu iyi ndwara ntabwo irahavugwa.

Minisiteri y’ubuzima ivuga ko undi ari umuvandimwe w’uyu, ufite imyaka 36 wageze mu Rwanda tariki 08/03 waje avuye mu birwa bya Fiji anyuze muri Amerika no muri Qatar.

Muri Fiji ntabwo haravugwa iyi ndwara ariko aho bavuga ko yanyuze muri Amerika imaze gufata abantu 3,782 yica 69, naho muri Qatar imaze kwandura abantu 401.

Undi minisiteri y’ubuzima ivuga ko ari umugabo w’umunyarwanda w’imyaka 30 udaherutse kugira ingendo mu mahanga.

Naho uwa kane ni umusore w’imyaka 22 ufite ubwenegihugu bwa Uganda wageze mu Rwanda ejo ku cyumweru tariki 15 avuye i Londres mu Bwongereza.

Aba bakurikira umuhinde waje mu Rwanda tariki 05/03 nyuma bakamusangamo iyi ndwara nk’uko byatangajwe kuwa gatandatu.

Minisiteri y’ubuzima ivuga ko aba bantu bose bari kuvurirwa ahabugenewe ari nako hashakishwa abantu bahuye nabo ngo basuzumwe.

Kugeza ubu u Rwanda nirwo rufite umubare munini w’abamaze kwandura iyi ndwara mu karere.

Covid-19 muri Afurika yo munsi y’ubutayu bwa Sahara kugeza ubu:

South Africa 61
Senegal 24
Rwanda 5
Cameroun 4
Ivery Coast 4
Ethiopia 4
Burkina Faso 3
Kenya 3
Seychelles 3
Nigeria 2
DR Congo 2
Namibia 2
Sudan 1
centre Afrique 1
Congo Brazza 1
Gabo 1
Guinea 1
Eswatini 1
Togo 1

Abashya bagaragaye ni aba nkuko bigaragara mu itangazo rya Minisiteri y’ubuzima.

Itangazo rya Minisiteri y’ubuzima

Ntakirutimana Deus

0Shares

Leave a Reply

Your email address will not be published.