August 15, 2020

The Source Post

Real news from real source

“Kwanza wowe uri umuhirimbiri?” Imvugo ya Minisitiri yavugishije benshi

Umunyamabanga wa Leta muri Minisiteri y’Ubutegetsi bw’igihugu Nyirarukundo Ignatienne aherutse gusa n’uterana amagambo n’umugabo wari kugororerwa Iwawa, ahandi agaragara abaza umugabo na we wagororwaga niba ari umuhirimbiri, imvugo zitanyuze abazumva.

Ni imvugo yibutsa itaravuzweho rumwe yazanywe n’uwari umunyamabanga wa leta muri minisiteri y’ubutabera, Me Evode Uwizeyimana ubwo yabwiraga abanyamakuru ko ari imihirimbiri.

Ubusanzwe iyo abaturage bumvise ko umuyobozi runaka, cyane nka Minisitiri usanga bajya kumwakira ari benshi, kubera urugwiro baba bamufitiye ndetse n’icyubahiro bamugomba, ndetse n’ibyo baba bamutezeho nk’uwajya mu nama ya guverinoma akavuga ibibazo byabo, akarengane se cyangwa ibitekerezo byabo, nyamara imvugo nk’izi zishobora kugira ingaruka zitari nziza ku bazumva.

Izi mvugo za Nyirarukundo zagarutsweho mu nkuru ya TV1, abaturage bagaragaza ko batishimira izi mvugo z’abayobozi babona ko ari ukubacunaguza.

Hari mu cyegeranyo bise “Imvugo za bamwe mu bayobozi zumvikanye nabi mu baturage”.

Dore zimwe muri zo

Umunyamabanga wa Leta muri Minisiteri y’Ubutegetsi bw’ igihugu Nyirarukundo Ignatienne yumvikanye abaza umugabo wari mu kigo ngoromuco gikusanyirizwamo abafashwe nk’inzererezi (transit center) cya Gashonga mu Karere ka Rusizi, iby’uko yahaje, undi amubwira ko bahamuzanye kubera ko atagira ibyangombwa, minisitiri aba nk’utanyuzwe.

Yabajije uwo mugabo ati “kwanza wowe uri umuhirimbiri? Ufite umuryango? Undi aramusubiza ati “Umugore wanjye yarapfuye, ariko mfite abana batatu”.
Minisitiri yongeraho ati “Ubu se abo bana uzababwira ko aha waje gukora iki? waje gusura? waje gutembera? uri mu kiruhuko? urihe?”

Umuturage abuze ayo acira n’ayo amira avuga mu ijwi ritumvikana. Ni uko Minisitiri ati “Ahubwo wararindagiye”.

Urundi rugero ni aho uyu Minisitiri yaganiraga n’abagororerwa mu kigo kibushinzwe cya Iwawa. Yagiranye ikiganiro n’umugabo wabyaye abana umunani amubaza niba yarababyaye ari mu irushanwa.

Yaramubajije ati “ariko se wowe abo bana umunani wari mu irushanwa ?” Umugabo aramusubiza ati “Oya ntabwo nari mu irushanwa ni Nyagasani wabampaye .”

Minisitiri ati “ reka reka wimubeshyera, Nyagasani se ni we ushyigikira abantu batita ku bo babyaye?” na we yasoje amubwira ati “Ubu rero uranyiteje ,ugabanye amagambo”.

Iyindi mvugo ikomozwaho ni iy’uwari umuyobozi w’ikigo cy’igihugu gishinzwe ubuziranenge (RSB) Dr Cyubahiro Bagabe Marc wakomozaga ku bacuruzi banusura ibyo bacuruza, akabita abajura, ariko imvugo ye igasa n’ibyita abacuruzi bose muri rusange, aho kugaragaza ko ari abakora ibidakwiye gusa.

Aha yaragize ati “Dukorana n’ amabandi , abacuruzi ni amabandi “ Yongeyeho ati “Baratwishe, twarashize, ubu turarwana n’ingengera, turarwana n’amabandi, abacuruzi ni amabandi.”

Imvugo isoza izindi ni iyakoreshejwe n’uwari Umunyamabanga wa Leta muri Minisiteri y’Ubutabera Me Evode Uwizeyimana, mu nama ya 14 y’Umushyikirano asubiza ku gitekerezo cyari cyatanzwe na Musenyeri Nzakamwita Servelien uyoboya Diyoseze ya Byumba unashinzwe umuryango mu nama y’Abepisikopi Gatorika, ku birebana n’ibibazo byugarije umuryango nyarwanda agaragaza ko niba nta gikozwe ugana ahabi kurushaho.

Icyo gihe Minisitiri Evode yabaye nk’upfobya igitekerezo cye agira ati “Ariko ubundi ko ari Musenyeri atagira urugo iby’umutekano w’ ingo abimenya ate ?”

Imvugo umuhirimbiri isobanura iki?

Ikinyamakuru Value News, cyasobanuye iri jambo cyifashishije inyandiko yumunyamakuru urimazemo igihe kirekire Bwana Sam Gody Nshimiyimana.

Munyandiko ye yise “Je suis UMUHIRIMBIRI! “ bisobanuye ngo ndi umuhirimbiri (aha yashakaga kuninura bamwe mu bayobozi bita abantu imihirimbiri, dore ko barenze umwe, yagize ati “guhirimbira si ugukena ku mufuka, cyangwa kugira inzara imbere y’imbavu.Guhirimbira hiyongeraho no kubura indangagaciro –muntu ku buryo rubanda ubamo iguha akato, ikagucira urubanza,ukaba rubebe,umwe udakaraba,udasokoza,utamesa,udatinya imyaka y’abaturanyi,mbese asa nka rya tungo Padiri Kagame yise itungo ryo mu batindi, abarikunda umuhore bakaritazira indyoheshabirayi, ab’ubu bakaryita akabenzi .” Sam Goddy asoza agira ati “ngiyo isura y’Umuhirimbiri”

Itegeko ngenga no 61/2018 ryo ku wa 10/09/2008 rigenga imyitwarire y’abayobozi rigaragaza uburyo abayobozi bakwiye kwitwara imbere y’ abo bayobora, ibyo babujijwe ndeste n’ ibihano bashobora gufatirwa igihe barengereye mu myitwarire yabo.

Iyi mvugo yakoreshejwe na Minisitiri Nyirarukundo ikomeje kuvugwaho ku mbuga nkoranyambaga nk’idakwiye gukoreshwa n’umuyobozi, kuko ngo n’umuturage ubwiye nabi mugenzi we abibazwa.

Imvugo yakoreshejwe na Minisitiri Nyirarukundo ishobora kugira ingaruka ku buryo bamwe mu bayobozi bafatwa n’abaturage.

Inkuru ya TV1 igaragara mu buryo bw’amajwi n’amashusho.

https://youtu.be/-iaa0yPUHoo

Ntakirutimana Deus

0Shares
Translate »