April 1, 2020

Menya hoteli ‘One&Only Gorilla’s Nest’ idasanzwe muri 2020

Amahanga arafata za rutemikirere, imodoka z’abifite zituruke mu byerekezo bitandukanye mu mpera za Gashyantare 2020 zigana i Musanze, ahitwa mu Kinigi, ahazatahwa ku mugaragaro hoteli One&Only Gorilla’s Nest.

Iyi hoteli umuntu yagereranya izina ryayo n’iry’icumbi ry’ingagi(One&Only Gorilla’s Nest), iherereye mu gice cy’imisozi miremire, hafi ya pariki y’igihugu y’ibirunga, ikikijwe n’ibyiza nyaburanga biri mu Majyaruguru y’u Rwanda, birimo ingagi zo mu birunga, ubuvumo bwikoze mu myaka miliyoni 65 n’ibindi.

Ni imwe mu zifite inyubako zibereye amaso, ikikijwe n’ibidukikije birimo inturusu ndende zibereye ijisho zituma abayigana bahumeka umwuka muzima uruta uw’abagana muri sauna, ifite imitako ya Kinyarwanda ahantu hatandukanye ndetse ikagira na serivisi zitarangwaga mu Kinigi.

Abatuye Kinigi bayita hoteli nshya yubatse kwa Muvunyi(wayoboye Rayon Sports), hari abayimenya barebeye ku modoka zibereye ijisho zifite ibara ry’umweru zikora ingendo nyinshi buri munsi mu muhanda Kinigi-Musanze(mu mujyi) zitwara abantu batandukanye, zirimo kwasiteri (coasters) zanditseho Temberurwanda n’izindi z’ama-jeep zanditseho One&Only.

Agaciro k’iyi hoteli kiyongereye kurushaho ndetse bituma bamwe bayimenya ubwo Umwana w’Umukuru w’Igihugu, Madame Ange Kagame yandikaga ku rukuta rwe rwa twitter ko yishimiye ibihe by’ukwezi kwe kwa buki ari muri iyi hoteli, icyo gihe yakoreraga gusa muri Nyungwe, none yaguriye amashami yayo mu Kinigi.

Ifite resitora, aho guparika hihariye, ubwogero bugezweho ndetse n’icyumba cyo gukoreramo siporo. Ifite kandi bare, ubusitani bugezweho, ikaba ikora ubudafunga n’ibyumba byayo bisaga 20.

Uretse kuba abahacumbika bafashwa kubona amatike y’indege ku buryo bworoshye no kugezwa ku kibuga, hari interineti yihuta, ndetse n’ibyumba bifite ibyuma bibishyushya bikanabikonjesha ku rugero rubereye ukirimo. Aha kandi harimo televuziyo zikoreshwa n’ibyogajuru n’ibindi byangombwa nkenerwa.

Muri iyi hoteli kandi harimo sawuna n’izindi serivisi zibereye abahagana.

Iyi hoteli ni imwe mu zatanze akazi ku batuye Kinigi n’abaturutse hirya no hino mu Rwanda ndetse no muri Amerika n’i Burayi bari mu mirimo yo kuyubaka.

One&Only Gorilla’s Nest iherereye muri metero nka 300 umuntu ava muri santere ya Kinigi akomeje inzira igana muri pariki y’i Birunga, ku birunga Bisoke, Karisimbi n’ibindi. Iri ku ntera y’ibirometero 4 z’ikirunga cya Sabyinyo.

Amafoto agaragaza ubwiza bw’iyi hoteli

Ntakirutimana Deus