LONI yahagaritse gukorana na CARITAS kubera padiri ‘ufata abana ku ngufu’

Umuryango w’abibumbye wahagaritse imikoranire n’umuryango ufasha wa Kiliziya Gatolika, CARITAS, muri Repubulika ya Centrafrique nyuma yaho bigaragariye ko uwari uwukuriye muri icyo gihugu yari yarahamwe no gufata abana ku ngufu.

Ishami rya ONU ryo guhuza ubufasha bw’imbabare (OCHA) ryavuze ko muri Centrafrique hari “ibirego bikomeye byo guhohotera abana” ku wahoze ari mukuru wa CARITAS – umupadiri w’Umubiligi Luk Delft.

Yakuwe kuri uwo mwanya kandi ntakiri muri Centrafrique, nkuko CARITAS ibivuga.

Abategetsi bo muri Centrafrique bari gukora iperereza.

Abategetsi b’Ububiligi na Kiliziya Gatolika na bo bari gukora iperereza kuri ibyo birego.

Hatanzwe ikirego ku gufata ku ngufu abana bishinjwa uwo mupadiri, nkuko umushinjacyaha wo muri Centrafrique yabibwiye ibiro ntaramakuru AFP mu murwa mukuru Bangui.

Ubuyobozi bwa OCHA bwavuze ko mu mikorere y’iryo shami ritihanganira na gato ihohotera rishingiye ku gitsina.

Urwego OCHA rwabwiye BBC dukesha iyi nkuru ko iyo mikoranire na CARITAS ikomeza guhagarikwa kugeza amaperereza ageze ku kintu gisobanutse.

Mu mwaka wa 2012, Padiri Delft yahawe igihano gisubitswe kubera guhamwa n’ihohotera rishingiye ku gitsina rigera no mu mwaka wa 2001, nkuko bitangazwa n’ibiro ntaramakuru AFP.

Yanahanishijwe kumara imyaka 10 adakora akazi ako ari ko kose katuma agira aho ahurira n’abana n’urubyiruko.

Ariko yoherejwe muri Centrafrique mu mwaka wa 2013, ahabwa akazi ko gukora muri CARITAS mu mwaka wa 2015, nkuko bitangazwa n’ikigo Dignity Foundation – urwego rwashyizweho na Kiliziya Gatolika mu kurwanya ihohoterwa.

Uwo mupadiri yakoze imyaka ibiri akorera mu mujyi wa Kaga-Bandoro uri mu majyaruguru y’igihugu, mbere yo kugirwa umunyamabanga mukuru wa CARITAS, nkuko bitangazwa n’ibiro ntaramakuru AFP.

CARITAS yavuze ko “ibabajwe ndetse irakajwe” n’ibirego by’ihohotera bishinjwa uwo mupadiri kandi ko iri gukora ngo ivugurure ingamba zo kurengera abana.

ND

admin

The Source Post is a website which is aiming to deliver a real info from real source, no fake news.

Leave a Reply